Köçkünlər yolu bağlayıb

Bakı/25.12.17/Turan: Binqədi rayon, 9-cu mikrorayon, Həmzə Babaşov küçəsində məskunlaşmış qaçqın və məcburi köçkünlər onlara verilməli olan evlərin pulla satıldığını iddia edirlər. Buna etiraz edənlər bu gün, dekabrın 25-i Cavadxan küçəsinin Milli Oftalmologiya Mərkəzinin qarşısından keçən hissəsini bağlayıblar.

Turan-ın xəbərinə görə, etiraz edən məcburi köçkünlər evlərin verilməsində pul amilinin rol oynamasına, ev bölgüsündə ailə üzvlərinin sayının nəzərə alınmamasına narazılıqlarını bildiriblər.

Aksiya iştirakçılarından Nailə Şahverdiyeva deyib ki, qanuna görə, 2 nəfərdən ibarət ailə 1, 3 nəfərdən ibarət ailə 2, 5 nəfərlik ailə isə 3 otaqlı mənzillə təmin olunmalıdır.

"Qaçqınkom" evləri satıb, qalıb bir otaqlı evlər. İndi 5-6 nəfərlik ailəyə 1 otaqlı ev verirlər, prezidentə deyirlər ki, evlə təmin etdik", deyə şikayətçi bildirib.

Digər iştirakçılar da eyni məzmunlu narazılıqlarını bildiriblər. Onlar da "Qaçqınkom"un bölgü siyasətindən narazılıqlarını, pulu-imkanı olanların daha geniş mənzillərə sahib çıxdıqlarını bildiriblər.

Qaçqın və məcburi köçkünlərin aksiyası 1 saata yaxın davam edib.

Əraziyə Binəqədi rayon Polis İdarəsinin və çevik polis alayının əməkdaşları gətirilib. Polis idarəsi rəsmiləri ilə danışıqlardan sonra etirazçılar yolu açıblar. Rəsmilərlə söhbət davam etdirilib.

Narazılara bildirilib ki, problemlə bağlı Qaçqın və Məcburi Köçkünlərin İşləri üzrə Dövlət Komitəsi məlumatlandırılıb. Lazımi addımların atılacağı vəd edildikdən sonra məcburi köçkünlər dağılışıblar.

Qaçqın və Məcburi Köçkünlərin İşləri üzrə Dövlət Komitəsindən narazılıqla, köçkünlər üçün nəzərdə tutulan evlərin satılması ilə bağlı şərh almaq mümkün olmayıb. -05B-