Bakı meriyası mitinq keçirmək üçün yenə də Lökbatanı təklif edir

Bakı/26.02.20/Turan: Bakı meriyası bir sıra müxalifət partiyasının fevralın 29-da paytaxtın mərkəzində mitinq keçirməsinə icazə verməkdən imtina edib. Meriya mitinqi mərkəzdən 15 km. aralıda Lökbatan qəsəbəsində keçirməyə dəvət edib.

Xatırladaq ki, fevralın 24-də Müsavat, REAL partiyaları, eləcə də D18 Hərəkatı seçki saxtakarlığına etiraz olaraq mitinq keçirməyə təşəbbüs göstəriblər. Onlar şəhər meriyasından mitinqin paytaxtın mərkəzində səkkiz yerdən birində keçirilməsinə icazə verilməsini xahiş ediblər.

“Aldığımız cavabda deyilir ki, təklif etdiyimiz yerlərdən 7-i intensiv nəqliyyat və sıx məskunlaşma zonasıdır. Belə yerlərdə aksiya keçirmək təhlükəsizlik baxımından məqsədəuyğun deyil. “Məhsul” stadionuna gəldincə, orada təmir gedir, buna görə də Lökbatana gedin”, - Ruslan İzzətli Turan-a bildirib.

Onun sözlərinə görə, aksiyanın təşkilatçıları Lökbatanda mitinq ideyasından imtina ediblər və yaxın vaxtlarda məkan barədə qərar qəbul edəcəklər. -21B-