Azərbaycan Baş Prokurorluğu Semyon Peqov və Semyon Baqdasarovun barəsində cinayət işi qaldırıb

Bakı/20.11.20/Turan: “WarGonzo” layihəsinin müəllifi, Rusiya Federasiyasının vətəndaşı Semyon Peqovun “SolovyovLive” verilişində Yaxın Şərq və Orta Asiya Araşdırmaları Mərkəzinin direktoru, RF vətəndaşı Semyon Baqdasarovla “Dağlıq Qarabağ və ətraf rayonların işğaldan azad edilməsi” mövzusunda birgə apardıqları videoformatlı müzakirə zamanı ermənilərin məğlubiyyətlə barışmayaraq Qarabağdakı Azərbaycan əsgərlərinə hücumlar edilməsi, müxtəlif döyüş əməliyyatlarının hazırlanması, partizan müharibəsinin başlayacağı barədə proqnozlar vermələri, bununla bağlı müəyyən məlumatlarının olması və müxtəlif üsullarla təxribat xarakterli ifadələrə yol vermələri müəyyən edilib.

Baş Prokurorluq hesab edir ki, Peqov və Baqdasaro Azərbaycan CM-in 214-2 (terrorçuluğa açıq çağırışlar), 281.2 (bir qrup şəxs tərəfindən Azərbaycan Respublikasının ərazi bütövlüyünün parçalanmasına yönələn açıq çağırışlar), 283.2.1-ci (zor tətbiq etmə hədəsi ilə mill düşmənçiliyin salınmasına yönələn açıq çağırışlar kütləvi informasiya vasitələrindən istifadə edilməklə törədildikdə) maddələrini pozublar.

Göstərilənlə əlaqədar cinayət işinin istintaqı çərçivəsində RF Baş Prokurorluğuna və digər ölkələrin hüquq-mühafizə orqanlarına hüquqi yardımın göstərilməsi haqqında rəsmi vəsatətlər göndərilməklə Peqov və digərləri ilə bağlı zəruri istintaq hərəkətlərinin keçirilməsi xahiş edilib.

Qeyd edək ki, Peqov müharibə günlərində Qarabağda separatçıların düşərgəsində oturub, özünü ştatlı təxribatçı kimi aparıb, ermənilərə açıq şəkildə dəstək verərək Azərbaycan Silahlı Qüvvələrini Qarabağa hücumda ittiham edib.

Bağdasarov isə Kremlim təbliğatçısı Solovyovun muzdlu təxribatçısıdır,  illərdir ki, Rusiya televiziyasında Azərbaycana çirkab atır, Qarabağ separatçılarını açıq şəkildə dəstəkləyir.-02В-