Lavrovun Qarabağın statusu, Laçın dəhlizi, Naxçıvanla əlaqə və Yerevan və Qarabağ arasında əlaqələr haqqında dedikləri

Moskva/18.01.21/Turan: Dağlıq Qarabağın statusu məsələsindən üç liderin 9 noyabr tarixli birgə bəyanatında qəsdən bəhs edilməyib. Regionun statusu məsələsi ilə ATƏT-in Minsk Qrupunun həmsədrləri məşğul olacaq. “Onlar indi tərəflərlə əlaqələrini bərpa ediblər və bir daha regiona getməyə hazırlaşırlar”, deyə bazar ertəsi keçirilən mətbuat konfransında RF XİN başçısı Sergey Lavrov bildirib.

“Dağlıq Qarabağın statusu məsələsi, Yerevanın və Bakının mövqelərini götürsək, ziddiyyətlidir, buna görə də üç lider bu məsələnin üstündən keçmək və onu gələcəyə saxlamaq qərarına gəlib”, deyə Lavrov qeyd edib.

Diplomat əlavə edib ki, Dağlıq Qarabağın statusunun müzakirə edilməsi gələcəkdə mümkün olacaq və bu mövzuya hələ qayıdılmalıdır, amma hazırda bunun vaxtı deyildi.

“Çox ümid edirəm ki, indi emosiyalar ikinci plana keçiriləcək. Yeri gəlmişkən, bəlkə də buna görə indi Dağlıq Qarabağın statusu mövzusunu prioritet kimi irəli sürmək üçün heç də yaxşı vaxt deyil.

Statusa qayıtmaq lazımdır və əsas odur ki, bu məsələ ilə bağlı Ermənistan və Azərbaycan arasında regionda bərpa edilməli olan yaxşı qonşuluğa əsaslanan konkret, sakit hüquqi müzakirələr aparılsın”, deyə Lavrov qeyd edib.

Nazir vurğulayıb ki, yeni marşrutu olacaq Laçın dəhlizi haqqında razılaşmaya əlavə olaraq, “Azərbaycanın əsas hissəsi ilə Naxçıvan arasında etibarlı, daimi əlaqə də yaradılacaq və bu, dövlət başçılarının təsbit etdiyi razılaşmadır”.

“Biz razılaşırıqsa ki, - hamı bununla razıdır, - Qarabağ erməniləri və Ermənistan erməniləri arasında əlaqə olmalıdır, bu səviyyədə həyata keçiriləcək əlaqələrə mane olacaq səbəblər görmürəm”, deyə RF XİN başçısı bildirib. Onun sözlərinə görə, “Ermənistan rəsmiləri Dağlıq Qarabağa humanitar yardım göstərilməsinə cəlb edilib, bu da Bakıda heç bir mənfi emosiyaya səbəb olmur və bu, fərqli olsaydı qəribə olardı”. Eyni zamanda, Lavrovun sözlərinə görə, “bu Ermənistan rəsmilərinin Qarabağda kifayət qədər siyasiləşdirilmiş bəyanatlar səsləndirməsi, yəqin ki, gərginliyə səbəb olur”.

O əlavə edib ki, hazırda Moskva “Azərbaycan və Ermənistan rəhbərliyi arasında əlaqələr qurulmasına, etimad mühitinin yaradılmasına” xüsusi diqqət yetirir.

“Sizə yüz faiz zəmanət verirəm ki, Rusiya sülhməramlılarının məsuliyyət zonası həm Azərbaycan, həm də Ermənistan tərəfin maraqlarını təmin edəcək formadır”, deyə Lavrov bildirib. -02D-