İlin sonuna qədər Bakı və Yerevan arasında sülh sazişi imzalanacaqmı?

Bakı/05.09.22/Turan: Ötən həftənin sonunda İlham Əliyev İtaliya qəzetinə müsahibəsində bildirib ki, bu ilin sonuna qədər Azərbaycanla Ermənistan arasında sülh sazişi imzalana bilər.

Ötən gün Ermənistan teleqram- kanalları bildiriblər ki, Ermənistanın baş naziri Nikol Paşinyan öz partiyasının üzvlərilə qapalı iclasda analoji bəyanatla çıxış edib. O işarə edib ki, onu bunu etməməyə çağıran qüvvələrin təzyiqinə boyun əyməyəcək.

Həmin mənbələr bildiriblər ki, Azərbaycan Qarabağdan bütün iriçaplı silahların çıxarılmasını şərt qoyub və Rusiya sülhməramlıları da buna təkid edirlər.

Eyni məsələ bazar günü Xankəndidə də müzakirə edilib. Separatçıların lideri Araik Arutyunyan Qarabağ qüvvələri hərbi rəhbərliyinin müşavirəsini keçirib.

Separatçıların liderləri və Ermənistan müxalifəti Qarabağın Azərbaycanın tərkibinə daxil edilməsilə razılaşmayacaqlarını bildirməkdə davam edirlər.

Xatırladaq ki, Bakı ərazi bütövlüyünün qarşılıqlı tanınmasını nəzərdə tutan beş bənd əsasında sülh müqaviləsinin imzalalanmasını təklif edib. Azərbaycan erməni tərəfinin Qarabağa muxtariyyət statusu verilməsi cəhdlərinin qarşısını alıb. 02D