Dini fəalın ailə üzvləri və yaxınları onun istintaq təcridxanasında döyüldüyünü bildiriblər

Bakı/17.07.23/Turan: Müsəlman Birliyi Hərəkatının 1 saylı Bakı İstintaq Təcridxanasında saxlanılan fəalı Ceyhun Balaşov bu müəssisədə fiziki təzyiqə məruz qalıb, daha sonra Azərbaycan Penitensiar Xidmətinin hospitalına yerləşdirilib.

Bu barədə Turan-a onun oğlu Arif Balaşov bildirib.

Onun sözlərinə görə, fəal iyulun 11-də nəzarətçilər tərəfindən döyülüb və 3 gün sonra Penitensiar Xidmətin Müalicə Müəssisəsinə köçürülüb.

"İyulun 15-də həbsxana xəstəxanasında mənə atamla qısa görüş veriblər. Atam deyib ki, iyulun 11-də nəzarətçilər onu döyüb. Onun qollarında qançırlar gördüm. Bədəninin qalan hissələrini görə bilmədim. Atam çox halsız vəziyyətdə idi, çox arıqlamışdı", deyə fəalın oğlu qeyd edib. 

Arif Balaşov bildirib ki, ailəsi Beyləqan rayonunun Əlinəzərli kəndində yaşayır. 

Ceyhun Balaşov meyvə satışı ilə məğul olurdu. Bu il fevralın 2-də Cinayət Məcəlləsinin 234.4.3 maadəsi (Narkotik vasitələrin və ya psixotrop maddələrin qanunsuz hazırlanmasında və emalında istifadə etmək məqsədi ilə prekursorları hazırlama, əldə etmə, saxlama, göndərmə, daşıma və ya satma - külli miqdarda törədildikdə) ilə həbs olunub. İttiham sübut olunarsa onu əmlakı müsadirə olunmaqla beş ildən on iki ilədək müddətə azadlıqdan məhrumetmə cəzası gözləyir.

İyulun 11-də Lənkəran Ağır Cinayətlər Məhkəməsində Ceyhun Balaşavun cinayət işi üzrə məhkəmə baxışı başlayıb. Balaşov məhkəmədə ittihamı qəbul etmədiyini, narkotiki cibinə qotduqlarını bildirib, deyə Müsəlman Birliyi Hərəkatından Turan-a bildiriblər.

"Ceyhun Balaşov narkotik ittihamını təkzib edib. O deyib ki, ölkədə əsl narkotik ticarətçiləri "məlumdur", məhz onun bu etirazı ona qarşı işgəncələrə səbəb olub", deyə MBH-dən bildiriblər.

Lakin Penitensiar Xidmətin mətbuat xidmətindən Balaşovun döyüldüyü haqqında məlumatı təkzib ediblər.

İdarədən qeyd ediblər ki, o, "psixi vəziyyəti ilə əlaqədar" Müalicə Müəssisəsinə köçürülüb.

"Müayinələr zamanı səhhətində ciddi patalogiya və zorakılıq əlamətləri aşkar olunmayıb. Sosial şəbəkələrdə Balaşovun təcridxanada qolunun sınması və işgəncələrlə üzləşməsi barədə məlumatların yayılması və bundan ailə üzvlərinin narahatlıq keçirmələri nəzərə alınaraq 15.07.2023-cü il tarixdə saat 15:00 radələrində ona oğlu və dayısı ilə görüş təqdim olunub. Görüş zamanı həbsdə saxlanılan şəxsin səhhəti, aparılmış müayinələr və nəticələri, habelə görülən tibbi tədbirlər barədə onlara ətraflı məlumat verilib. Tam əmin olmaları üçün qohumlarının iştirakı ilə C.Balaşovun bədən səthinə baxış keçirilib, nəticədə bədən xəsarətləri, pis rəftar və zorakılıq əlamətləri aşkar olunmamış, qohumlarının iştirakı və imzası ilə müvafiq akt tərtib olunub", deyə idarədən qeyd ediblər.

Penitensiar Xidmətin mətbuat xidmətindən həmçinin qeyd ediblər ki, "hzırda Balaşovun müalicəsi davam etdirilir, səhhəti həkim nəzarətindədir". 03